Hap i rëndësishëm në karrierë, futbollisti i Vllaznisë, Nijavexhi ka marrë ftesë nga kombëtarja e Togos. Lajmi është konfirmuar ditën e sotme nga vetë klubi shkodran nëpërmjet një postimi në faqen zyrtare, ku është publikuar edhe ftesa e mbërritur në adresën e klubit.
POSTIMI I VLLAZNISË:
FUTBOLLISTI NYAVEDJI MERR FTESË NGA KOMBËTARJA E TOGOS
Ditën e sotme në klubin e Futbollit Vllaznia ka ardhur ftesa zyrtare e Federatës së Futbollit të Togos për grumbullimin e futbollistit tonë Elom Nyavedji në kombëtaren e këtij vendi për një grumbullim që ajo do të zhvillojë në Turqi në datat 29 maj- 10 qershor. Gjatë këtyre ditëve kombëtarja e Togos do të zhvillojë ndeshje miqësore më datat 2, 5 dhe 8 qershor pikërisht ndaj Nigerisë, Guinesë dhe Gambias.
KF Vllaznia ndjehet mirë që lojtari i saj Nyavedji grumbullohet në kombëtare por ndërkohë i ka bërë të ditur Federatës së Togos se ai do të jetë i detyruar të qëndrojë me ekipin tonë deri më 30 maj, sepse atë ditë do të luhet finalja e Kupës së Shqipërisë dhe menjëherë më pas mund të udhëtojë drejt Turqisë për t’u bashkuar me kombëtaren e vendit të tij.