Saimir Tahiri u rikthye në Kuvend sot pas një mungese të gjatë, duke tërhequr një vëmendje të madhe mediatike por edhe politike. Ai u ndoq fillimisht nga gazetarët në hyrje të Kuvendit, ku u shfaq rreth orës 10 të mëngjesit. Tahiri u mundua t’u shmangej pyetjeve. Brenda në sallë ai u prit me mall nga disa kolegë, ndër të cilëve spikaste ministrja e Kulturës Mirela Kumbaro që e përqafoi. Tahiri pati një përplasje me Sali Berishën, i cili teksa dilte nga salla pas vendimit të opozitës për ta braktisur parlamentin, iu afrua deputetit të pavarur dhe nisi ta filmonte. Pasi doli jashtë, ish-deputeti socialist u ndal përpara gazetarëve.
Gazetari: A do të vazhdoni të vini rregullisht nga ky moment e tutje në Kuvend?
Tahiri: Kur të kem diçka për të thënë, sigurisht, do vij
Ish-ministri i Brendshëm kujtoi një episod të ndodhur sot në sallë, ku ish-kryeministri Sali Berisha që kërkoi largimin e tij, nisi ta filmonte. “Për mua është një ditë e lumtur që më filmoi Saliu, kam motiv ta mirëkuptoj, njeriun që fshiu filmimet në 21 janar, fshiu filmimet e kryeministrisë, sot të më filmojë mua.”, tha Tahiri.
Gazetari: Thuhet se po ju mbron Edi Rama, a është e vërtetë?
Tahiri: As më mbron njeri dhe as dua njëri t’më mbrojë. Për mua ka vlerë e vërteta dhe nuk ka vlerë kush mund t’më pengojë në rrugën time për të bërë drejtësi.
Tahiri: Nuk besoj se do të ketë bir nëne dhe bir ku*ve që do të më pengojë që të bëj drejtësi.
Rreth 1 orë pas këtij qëndrimi Saimir Tahiri bëri një sqarim në Facebook, ku akuzoi Sali Berishën dhe mohoi që të ketë përdorur sot ndonjë mesazh të koduar: “Kur gjyqin moral ta ben djalli…keshtu quhet ajo qe degjoj cdo dite nga goja e kujt ka qeverisur 25 vjet duke vrare e duke vjedhur per pushtet.
Pas thuajse 6 muajsh, shkova ne Parlament.
Kush e ka marre heshtjen time per dorezim, eshte gabuar. Eshte vetem respekt per drejtesine.
Kete rruge do ndjek me durim.
Ndersa me kete historine e mesazheve te koduara qe leshokam une, bjerini shkurt. As me duhet ti coj mesazh njeriu. Dhe po te kem, jam nga ata qe i ben drejteperdrejte.
Me intereson vetem e verteta dhe drejtesia, askush e asgje tjeter.
E nuk do ndalem!”, shkruan Tahiri në Facebook.
Ish-deputeti socialist, i cili tashmë është i pavarur, pasi PS-ja e hoqi nga grupi i saj, për shkak të hetimit që ka nisur Prokuroria ndaj tij, për përfshirjen e mundshme në trafikun e drogës me bandën e Habilajve, kishte një kohë të gjatë që nuk fliste në publik.
Tahiri rrezikonte të mos humbiste mandatin, në rast se vijonte të mungonte, duke iu afruar afatit maksimal të lejueshëm prej gjashtë muajsh mungesë.
Një ditë më parë, Edi Rama, në praninë e Federica Mogherinit, deklaroi se qeveria është e gatshme të japë autorizimin për arrestimin e tij, në rast se prokuroria do të jepte qoftë një provë të vetme ndaj Tahirit.
