Nga Blerti DELIJA
Si asnjëherë më parë në këto 28 vite, Shtetet e Bashkuara duket se kanë ndërmarrë një shenjestrim të hapur të një individi. Më saktë, një farësoj linçimi publik që e ka zanafillën në Ambasadën Amerikane në Tiranë për të vijuar në Departamentin Amerikan të Shtetit- DASH e për të marrë jehonë përmes VoA- Zërit të Amerikës.
Pavarësisht se ishte miratuar prej 10 vitesh, për herë të parë një ligj amerikan godet të parin një shtetas shqiptar. Sekretari amerikan i Shtetit Rex Tillerson ka firmosu një urdhër që i pengon ish- prokurorit të përgjithshëm Adriatik Llalla hyrjen në SHBA. Nisma duket ka patur nxitje nga ambasadori amerikan në Tiranë Donald Lu, i cili ja ka dalë të bindë shefin e tij në Uashington. Jo vetëm kaq. VoA, që në të gjithë botën konsiderohet “zëri i DASH”, ka shkuar edhe më tej.
Pasi është njoftuar masa e Tillerson kundër Llallës, VoA ka pyetur prokurorinë shqiptare: a keni ndërmend ta hetoni (arrestoni) Lallën pas vendimit të SHBA? Edhe ky një qëndrim i pazakontë, ndoshta unikal i një redaksie mediatike, pavarësisht se financohet nga DASH. Përgjigja, e cila sic e thotë edhe vetë VoA ishte “përgjigje pa përgjigje” ishte: “Prokuroria e Përgjithshme e Republikës i jep përparësi integritetit moral dhe professional të zyrtarëve.
Insitucioni i jep mbështetjen e plotë të gjithë prokurorëve që punojnë me përkushtim, dinjitet dhe integritet dhe mbështet qëndrimin për ndëshkimin e cilitdo që cënon parimet e shtetit të së drejtës.”. Përgjigja ka ardhur ditën, kur Komisioni i Pavarur i Kualifikimit, organ i procesit të Vettingut, ka shpallur ndalimin e procesit të rivlerësimit për Adriatik Llallën pas tërheqjes së tij nga e drejta për t’u zgjedhur gjyqtar në Apel. Edhe kjo, besojmë jo thjesht një rastësi.
Nga ana tjetër, Llalla po sillet tamam si shqiptar. Nuk po “e vë ujin në zjarr” që të afrohet me Lu-në. Madje, në një gazetë amerikane e sulmon hapur. Ai e akuzon diplomatin amerikan se e ka sharë, atë, familjen e tij. Gjyqtarët dhe vetë Llallën i ka trajtuar si kriminelë. Lu ka denigruar publikisht trupën e gjyqtarëve e prokurorëve dhe personalisht ish- prokurorin e përgjithshëm. Llalla hap sulmin e tij publik me fjalët “Lu keqinformoi DASH-in”.
Nuk është e vështirë të kuptohet se tashmë Llalla është në pozicionin më të vështirë të cdo paraardhësi të tij. Në Shqipëri mbrojtja politike ka forcën zero. Nga ana tjetër, duket se ka zgjuar “shqiponjën amerikane” e cila në këto kohë po kërkon me ngulm “peshkun e madh” që nuk e kapi dot në janar. A është Adriatik Llalla ky “peshk i madh”, në mos i janarit, i muajit prill? Ose siç thonë italianët “pesce d’ aprile”. Për ata që mbase nuk e kujtojnë, lidhet me 1 prillin- kuptimin e të cilës ne shqiptarët e dimë mirë.
