Kampionati i kategorisë së parë po shkon drejt fundit dhe Veleçiku është në rrugë të mbarë për të qenë aty ku dëshiroi të ishte në fillim të tij. Ai do të luajë ditën e shtunë në orën 16.00 në fushën sportive “Reshit Rusi” ndaj Burrelit.
Kjo është sfida e fundit për koplikasit në fushën e tyre ndërsa javën e fundit ata do të udhëtojnë drejt Shënkollit për të luajtur ndaj vendasve. Megjithatë futbollistët e Malësisë së Madhe nuk e kanë shumë mendjen tek sfida e fundit. Ata janë të fokusuar maksimalisht tek ndeshja ndaj matjanëve.
Në prag të kësaj ndeshje, Veleçiku duket në pozita disi më komode dhe për të siguruar qëndrimin në Superligë, i bën punë edhe barazimi ndaj Burrelit sepse vetëm një pikë i duhet për këtë gjë. Megjithatë koplikasit duan ta mbyllin si duhet kampionatin dhe për këtë arsye, ata i kanë vënë vetes detyrë të mbajnë vendin e gjashtë në renditje deri në fund.
Dhe e meritojnë këtë gjë sepse djemtë e drejtuar nga trajneri Besnik Duli kanë bërë një sezon shumë të mirë. Ndonëse duke i luajtur të gjitha ndeshjet jo në Koplik por në Shkodër, kjo nuk ndikoi shumë në paraqitjet e tyre sepse sportdashësit e Malësisë së Madhe i kanë mbështetur fuqimisht ato.
E njëjta gjë pritet të ndodhë edhe këtë herë në ballafaqimin e fundit në Shkodër. Veleçiku është shumë pranë arritjes së objektivit për të qenë edhe sezonin tjetër në kategorinë e parë dhe padyshim që planet pastaj do jenë të tjera.
